ဧရာဝတီယူနိုက်တက်ဘောလုံးအသင်း၏ Main Sponsor ၊ Kit Sponsor နှင့် Hydration Sponsor ပေးအပ်ခြင်းနှင့် စပွန်ဆာ စာချုပ် ချုပ်ဆိုခြင်း အခမ်းအနား ပြုလုပ်

MPT Myanmar National League 2018 ပြိုင်ပွဲဝင် ဧရာဝတီယူနိုက်တက်ဘောလုံးအသင်း၏ Main Sponsor ၊ Kit Sponsor နှင့် Hydration Sponsor ပေးအပ်ခြင်းနှင့် စပွန်ဆာ စာချုပ် ချုပ်ဆိုခြင်း အခမ်းအနားကို ယနေ့ မနက်ပိုင်းက Goal Hotel ရှိ မြန်မာနိုင်ငံဘောလုံးအဖွဲ့ချုပ် အစည်းအဝေးခန်းမ၌ ကျင်းပပြုလုပ်ခဲ့သည်။
အဆိုပါ အခမ်းအနားသို့ မြန်မာနိုင်ငံဘောလုံးအဖွဲ့ချုပ် အမှုဆောင်အရာရှိချုပ် ဦးဘုန်းနိုင်ဇော်၊ တွဲဖက်အထွေထွေအတွင်းရေးမှူး ဦးတင်မြင့်အောင်၊ ဧရာဝတီယူနိုက်တက်အသင်းဥက္ကဋ္ဌ ဦးမင်းလှိုင်၊ ဒုတိယဥက္ကဋ္ဌ ဦးအုန်းကျော်၊ AYA Myanmar Insurance မှ Managing Director ဦးမျိုးမင်းသူ၊ Grand Sport မှ Managing Director ဦးအောင်လွင်နှင့် 100 Plus Myanmar မှ Mr Prapas Rattanapas (Head of Marketing)၊ မြန်မာနိုင်ငံဘောလုံးအဖွဲ့ချုပ်မှ တာဝန်ရှိသူများ၊ စပွန်ဆာကုမ္ပဏီများမှ တာဝန်ရှိသူများ၊ ဧရာဝတီယူနိုက်တက်အသင်း ကစားသမားများ၊ ဖိတ်ကြားထားသည့် ဧည့်သည်များနှင့် စာနယ်ဇင်းမီဒီယာများ တက်ရောက်ခဲ့ကြသည်။
ဧရာဝတီတိုင်းဒေသကြီး ကိုယ်စားပြု ဧရာဝတီယူနိုက်တက်အသင်းကို လက်တွဲတစ်သက်တာ ဧရာမြန်မာအာမခံ (Partner for life) မှ Main Sponsor အဖြစ် ငွေကျပ် သိန်း ၁၀၀၀ ကိုလည်းကောင်း၊ Grand Sport မှ Kits Sponsor အဖြစ် အားကစားပစ္စည်းများကို လည်းကောင်း၊ သံဓာတ်အားဖြည့် အချိုရည် 100Plus မှ Hydration Sponsor အဖြစ်လည်းကောင်း လည်းကောင်း ၂၀၁၈ ရာသီအတွက် ပံ့ပိုးပေးခဲ့ခြင်းဖြစ်သည်။
AYA Myanmar Insurance အနေဖြင့် ပြီးခဲ့သည့် ၂၀၁၇ ရာသီမှ စတင်၍ ဧရာဝတီယူနိုက်တက်ဘောလုံးအသင်းကို Main Sponsor အဖြစ် ပံ့ပိုးပေးခဲ့ပြီး ယခုနှစ်အတွက် အဓိကစပွန်ဆာအဖြစ် ဆက်လက် ပံ့ပိုးပေးခြင်းဖြစ်သည်။ ဧရာဝတီယူနိုက်တက်အသင်းသည် ပြီးခဲ့သည့်ရာသီက မြန်မာနေရှင်နယ်လိဂ် အဆင့် ၄ နေရာ ရပ်တည်နိုင်ခဲ့ပြီး ယခုနှစ်တွင် အဆင့် ၁ နေရာမှ အဆင့် ၃ အတွင်း ရပ်တည်နိုင်ရန် ကြိုးပမ်းသွားမည်ဟု အသင်းဥက္ကဋ္ဌ ဦးမင်းလှိုင်ကပြောသည်။