MPT Myanmar National League 2018 ပွဲစဉ် (၁၅)၊ ပွဲစဉ် (၁၃) နှင့် ပွဲစဉ် (၁၁၅) တို့အား ကွင်းပြောင်းရွှေ့ကျင်းပသွားမည်ဖြစ်

ရန်ကုန်တိုင်းဒေသကြီး အစိုးရအဖွဲ့ရုံးမှ ၂၁ ရာစု ပင်လုံ ညီလာခံထောက်ခံပွဲအဖြစ် ငြိမ်းချမ်းရေးသီချင်း ဖျော်ဖြေခြင်း၊ ချစ်ကြည်ရေးဘောလုံးပွဲ ယှဉ်ပြိုင်ကစားခြင်း အစီအစဉ်များအား ရန်ကုန်မြို့၊ သုဝဏ္ဏကွင်း၌ ၂၇-၁-၂၀၁၈ ရက်နေ့တွင် ကျင်းပပြုလုပ်သွားမည်ဟု သိရပါသည်။
သို့ဖြစ်ပါ၍ အဆိုပါ အခမ်းအနားနှင့် တိုက်ဆိုင်နေသဖြင့် မြန်မာနိုင်ငံဘောလုံးအဖွဲ့ချုပ်၊ မြန်မာနေရှင်နယ်လိဂ်ကော်မတီမှ ကြီးမှူးကျင်းပလျက်ရှိသည့် MPT Myanmar National League 2018 ဘောလုံးပြိုင်ပွဲ ပွဲစဉ် (၁၅) အဖြစ် ဂျီအက်ဖ်အေ နှင့် ရတနာပုံအက်ဖ်စီ အသင်းတို့ ယှဉ်ပြိုင်ကစားမည့် ပွဲစဉ်အား သုဝဏ္ဏကွင်းမှ အောင်ဆန်းကွင်းသို့ မူလသတ်မှတ်ထားသည့် နေရက်နှင့် အချိန်အတိုင်း ပြောင်းရွှေ့ကျင်းပသွားမည်ဖြစ်ပါသည်။
ထို့ပြင် စစ်တွေမြို့၊ ဝေသာလီကွင်း၌ ကစားရန် သတ်မှတ်ထားသည့် MPT Myanmar National League 2018 ပွဲစဉ် (၁၃) ရခိုင်ယူနိုက်တက်-ဧရာဝတီယူနိုက်တက်ပွဲစဉ်အား နယ်မြေလုံခြုံရေးအခြေအနေအရ ပြိုင်ပွဲလက်ခံကျင်းပရန် အခက်အခဲများရှိပါသဖြင့် ပုသိမ်မြို့ရှိ ဧရာဝတီယူနိုက်တက်အသင်း၏ အိမ်ကွင်း၌ ပြောင်းရွှေ့ကျင်းပသွားမည်ဖြစ်ပါသည်။ ဆက်လက်ပြီး ၁၄-၇-၂၀၁၈ ရက်တွင် ပုသိမ်မြို့တွင် ကျင်းပရန် သတ်မှတ်ထားသည့် ဧရာဝတီယူနိုက်တက်-ရခိုင်ယူနိုက်တက် ပွဲစဉ်အား စစ်တွေမြို့၊ ဝေသာလီကွင်း၌ မူလသတ်မှတ်ထားသည့် ပွဲချိန်အတိုင်း ပြောင်းလဲကျင်းပမည်ဖြစ်ကြောင်း သတင်းထုတ်ပြန်အပ်ပါသည်။